પોલીસ અધિકારીએ ઝડતી લેવા બાબત

(૧) પોલીસ સ્ટેશનના ઇન્ચાજૅ અધિકારીને અથવા પોલીસ તપાસ કરતા કોઇ પોલીસ અધિકારીને એમ માનવાને વાજબી કારણ હોય કે જેની પોલીસ તપાસ કરવા માટે પોતાને અધિકાર છે તેવા ગુનાની પોલીસ તપાસ માટે જરૂરી વસ્તુ જે પોલીસ સ્ટેશન પોતાના ચાજૅમાં છે અથવા જયાં તે નોકરી કરે છે તે પોલીસ સ્ટેશનની હદમાં કોઇપણ જગ્યાએથી મળી આવવાનો સંભવ છે અને તે વસ્તુ પોતાના અભિપ્રાય પ્રમાણે વધુ પડતી ઢીલ થયા વિના બીજી રીતે મેળવી શકાય તેમ નથી તો તે પોતાની માન્યતાના કારણોની કેસ ડાયરીમાં લેખિત નોંધ કરીને અને જેને માટે ઝડતી લેવાની હોય તે વસ્તુ શકય હોય ત્યાં સુધી તે લખાણમાં નિદિષ્ટ કરીને તેવા સ્ટેશનની હદમાં કોઇપણ જગ્યાની તે વસ્તુ માટે ઝડતી લઇ શકશે કે લેવડાવી શકશે.

(૨) પેટા કલમ (૧) હેઠળ કાયૅવાહી કરતાા પોલીસ અધિકારીએ શકય હોય તો જાતે ઝડતી લેવી જોઇશે.

પરંતુ પેટા કલમ (૧) હેઠળ કરવામાં આવેલ ઝડતી ઇચ્છનીય રીતે મોબાઇલ ફોન દ્રારા ઓડિયો વિડિયો ઇલેકટ્રોનિક માધ્યમ વડે કરવું જોઇશે.

(૩) પોતે જાતે ઝડતી લઇ શકે તેમ ન હોય અને ઝડતી લઇ શકે તે અન્ય કોઇ વ્યકિત તે સમયે હાજર ન હોય તો તેમ કરવાના પોતાના કારણોની લેખિત નોંધ કરીને તે પોતાની સતા નીચેના કોઇ અધિકારીને ઝડતી લેવાનું ફરમાવી શકશે અને તેને ઝડતી લેવાની જગ્યા અને શકય હોય તો જેના માટે ઝડતી લેવાની હોય તે વસ્તુનો નિદૅશ કરતો લેખિત હુકમ આપશે અને તેમ થયે તે નીચેનો અધિકારી તે વસ્તુ માટે તે જગ્યાની ઝડતી લઇ શકશે.

(૪) ઝડતી વોરંટ અંગેની આ સંહિતાની જોગવાઇઓ અને કલમ-૧૦૩ની ઝડતી અંગેની સામાન્ય જોગવાઇઓ શકય હોય તેટલે અંશે આ કલમ હેઠળ લીધેલી ઝડતીને લાગુ પડશે.

(૫) પેટા કલમ (૧) કે પેટા કલમ (૩) હેઠળ કરેલી લેખિત નોંધની નકલો તે ગુના અંગેની વિચારણા કરવાની સતા ધરાવતા નજીકમાં નજીકના મેજિસ્ટ્રેટને તરત પણ ૪૮ કલાકથી વધુ ન હોય તેવા સમયમાં મોકલવી જોઇશે અને જેની ઝડતી લેવાયેલ હોય તે જગ્યાનો માલિક કે ભોગવટો કરનાર અરજી કરે તો મેજિસ્ટ્રેટે તેની નકલ વિના મૂલ્યે તેને આપવી જોઇશે.